Zupermaria

Zupermaria har dei siste par åra gjeve oss solide og fengslande låtar i høgt tempo, men har enno til gode å ta musikken ut på vegen. No er ho endeleg klar, og legg i februar ut på sin aller første turné.

Artisten gjorde sin entré i 2020 med albumet “Ka har du gjort nå, Maria”. Albumet var lyden av eit rastlaust og upolert stjerneskot, som evna å balansere si leikne morsmålspop kløktig mellom det sårbare og det dansbare.

Sidan har bergensartisten gjeve ut ei rekkje singlar, hatt 17 listeplasseringar på nasjonal radio, blitt nominert til P3 Gull og spelt festivalkonsertar til sekser på terningen.

Etter den hektiske inntredenen tok ho seg i fjor eit ørlite steg tilbake for å jobbe med ny musikk. I prosessen har ho skrapa djupare under overflata enn før, og skrive låtar som slepp lyttaren fleire hakk meir innpå personen bak det lite sjølvhøgtidelege artistnamnet.

No girar Zupermaria opp att. I haust kjem endeleg hennar etterlengta andrealbum, før ho neste år tar sitt første ordentlege steg ut på konsertscenane.